Prezident İlham Əliyev və birinci xanım Mehriban Əliyeva noyabrın 1-də İsmayıllı rayonunda səfərdə olublar. Bu barədə Prezidentin rəsmi saytında məlumat verilib.
İlham Əliyev Basqal-Sulut avtomobil yolunun açılışında iştirak edib. Basqal, Qıçatan, Tağlabiyan, Kəlfərəc, Zeyvə, Kürdüvan, Xankəndi, Mücü, Sərsurə, Kələzevə və Sulut kəndlərini birləşdirən avtomobil yolunun uzunluğu 30,1 kilometr təşkil edir.
Həmçinin səfər zamanı İsmayıllı şəhər 6 saylı tam orta məktəbin və Uşaq və Ailələrə Dəstək Mərkəzinin yeni binalarının açılışı olub.
Eyni zamanda dövlət başçısı və xanımı rayonun Lahıc qəsəbəsinə səfər ediblər. Onlar Bədöyün məscidində aparılan bərpa-təmir işləri ilə tanış olublar. Qeyd edilib ki, qəsəbədə görülən abadlıq işləri turistlərin marağını daha da artırıb. Bu ilin sentyabr ayına qədər Lahıcı 82 min turist ziyarət edib.
