İşğaldan azad edilən ərazilərdə minalardan təmizləmə işləri aparılır. Bu proses getsə də, biz insanları itiririk. Müharibədən sonra 200-ə yaxın Azərbaycan vətəndaşı - mülki və hərbi vətəndaş ya həlak olub, ya da ciddi yaralanıb. Bunu Prezident İlham Əliyev yanvarın 12-də yerli televiziya kanallarına müsahibəsində deyib.
Prezidentin sözlərinə görə, minatəmizləmə sahəsində ANAMA, Müdafiə Nazirliyi və Fövqəladə Hallar Nazirliyi birgə fəaliyyət göstərir.
Dövlət başçısı azad edilən ərazilərdə gedən quruculuq işlərindən danışıb: “Kəlbəcər, Laçın, Zəngilan, Qubadlı - Ermənistanla həmsərhəd olan yerlərdə 700 kilometrə yaxın yol çəkilib. Bütün azad edilmiş torpaqlarda 7 yarımstansiya inşa edilib”.
Azərbaycan lideri əlavə edib ki, Ağdam, Zəngilan, Hadrut, Daşaltı məscidlərinin təməli qoyulub, Şuşada isə yaşayış kompleksinin inşasına start verilib.
