Ötən ilin dekabrın 1-dən bu ilin sentyabrın 30-dək 359 nəfər zorakılığa məruz qaldıqları üçün Ailə, Qadın və Uşaq Problemləri üzrə Dövlət Komitəsinə müraciət ediblər. Onlardan 275-i qadın, 84-ü kişi olub. Bu haqda qurumun rəsmisi Teymur Mərdanoğlu noyabrın 18-də açıqlama verib.
Müəyyən edilib ki, ən çox müraciətlər Bakıdan olub. Qeyd edilən müddət ərzində zəng edənlərin əksəriyyəti evli olanlardır. Onlar arasında 197 nəfər evli, 130 nəfər subay, 32 nəfər isə boşanmışdır.
Təhsil səviyyəsi meyarında zorakılıqla üzləşənlərin 262-i orta təhsilli, 80-i ali təhsilli, 17-i isə təhsilsizdir. Müraciət edənlərdən 247 nəfər işsiz olub.
Statistikaya əsasən, bu il məişət zorakılığı ilə bağlı cinayətlərin sayı əvvəlki illə müqayisədə təxminən 25% artıb. Vətəndaşlar qadına qarşı zorakılıq halları ilə üzləşdikdə Baş Prokurorluğun “961” Çağrı Mərkəzinə müraciət edə bilərlər.
