Ölkədə sentyabrın 29-dan universitetlərdə tədris başlayıb. Lakin kiraye evlərin baha olması tələbələrə çətinlik yaradır. Buna görə də onların əsas çıxış yolu yataqxanalardır.
Bəs tələbələr universitetlərin yataqxanalarına hansı kriteriyalar əsasında qəbul edilir? Məsələ ilə bağlı Trend oktyabrın 7-də araşdırma edib.
Bakı Dövlət Universitetində (BDU) şəhid və qazi övladlarına, valideynləri əlil olan və ya ümümiyətlə olmayanlara, məcburi köçkünlərə və ən yüksək bal toplamış tələbələrə üstünlük verilir.
“Hal-hazırda tələbə evində 220 nəfər qalır. Bir nəfər üçün ödəniş 110 manatdır. Bunun 35 manatını universitet, qalanını isə tələbə özü ödəyir", - deyə BDU-dan bildirilib.
Tibb Universitetinin məlumatına əsasən, orada tələbələr 100% yataqxana ilə təmin olunur və heç bir kriteriyalar qoyulmur: “Şəhid ailələrindən olan və ya valideyn himayəsindən məhrum olan tələbələr yataqxanada ödənişsiz qalır. Qazi övladlarına isə güzəşt edilir”. Burada qiymətlər 30-90 manat arasında dəyişir.
Azərbaycan Dövlət Neft və Sənaye Universitetinin tələbə evi əcnəbilər üçün nəzərdə tutulsa da, orada onlarla yanaşı yerli tələbələr də qala bilirlər. Bir otağın qiyməti 100 manatdır. Burada 2-3 tələbə qala bilər. Ödəniş həmin tələbələrin arasında bölüşdürülə bilər. Aztəminatlı tələbələr Həmkarlar İttifaqı Komitəsinə müraciət etdikdə onların ödənişini komitə qarşılayır.
Azərbaycan Dövlət İqtisad Universitetinin tələbə evində isə məcburi köçkünlər məskunlaşdığı üçün yataqxanalar istifadəyə verilə bilmir.
