Azərbaycanda adambaşına düşən torpaq sahəsi bir çox ölkələrə nisbətdə daha azdır. Nəzərə alsaq ki, uzun illər ərazimizin təxminən 20%-i işğal altında idi, nəzərə alsaq ki, ərazimizin bir hissəsi iqlimə görə, torpağın keyfiyyətinə görə kənd təsərrüfatı üçün yararsızdır, əlbəttə, bu, bizim işimizi çətinləşdirir. Bunu yanvarın 12-də İlham Əliyev ölkənin ərzaq təhlükəsizliyi barədə danışarkən bildirib.
Eyni zamanda, o qeyd edib ki, torpaqlarımızla yanaşı, çaylarımız da işğal altında idi. Həmin çayların məcraları ermənilər tərəfindən dəyişdirilib. Xüsusilə də Tərtərçayın suyunun kəsilməsi bizi suvarma imkanlarından məhrum edib. Suvarma isə ərzaq təhlükəsizliyi üçün əsas amillərdən biridir.
İlham Əliyev bitkiçilik sahəsində olan mövcud durumla bağlı da fikir bildirib: “Son 15 il ərzində Azərbaycanda meyvə istehsalı 2 dəfə artıb. İki dəfə, yəni bu, çox böyük rəqəmdir. Pambıq istehsalı da dəfələrlə artıb. Demək olar ki, biz son beş il ərzində pambıqçılığı diriltdik və qeyri-neft ixracatında pambığın nisbəti ildən-ilə artır”.
“Bu gün mal ətinə baxsaq, biz özümüzü təqribən 90% səviyyəsində təmin edirik, qoyun əti ilə 100%. Azərbaycan heç vaxt süd istehsal etmirdi və bizdə ənənəvi olaraq mal-qaranın cinsi südçülük üçün əlverişli deyildi. Ona görə biz cins mal-qaranın alınmasına böyük vəsait xərclədik və bu gün Azərbaycanda əgər 1 milyondan çox iribuynuzlu mal-qara varsa, onun artıq 70 mini cins mal-qaradır. Beləliklə, süd və süd məhsullarının istehsalında biz 80%-ə çıxa bilmişik”, - deyə Prezident heyvandarlıqla bağlı danışarkən məlumat verib.
Lakin o qeyd edib ki, Azərbaycan hələ ki, özünü ərzaq məhsulları ilə tam təmin edə bilmir, xüsusilə buğda ilə. “Biz təqribən 3,3 – 3,4 milyon ton buğda istehlak edirik. Onlardan cəmi 2 milyonu Azərbaycanda istehsal olunur. Amma çalışmalıyıq ki, yerli istehsal artsın, ilk növbədə, məhsuldarlıq hesabına”, - deyə İlham Əliyev əlavə edib.
Dövlət başçısı vurğulayıb ki, bu çətinliklərə baxmayaraq, ölkəmizin qarşısında iki vəzifə dayanıb: “Birincisi, ərzaq təhlükəsizliyini maksimum dərəcədə təmin etmək. İkincisi, ənənəvi kənd təsərrüfatı sahələrini inkişaf etdirmək”.
