Lukoil neft şirkəti Petronas şirkətinin 15,5%-lik payını 2,25 milyard dollara alaraq Şahdəniz layihəsində payını 25,5%-ə çatdırdı. Bu barədə 7 oktyabr tarixində şirkətin rəsmi səhifəsində məlumat verilib.
Lukoil şirkətinin prezidenti Vahid Ələkbərovun sözlərinə görə, layihədə onların payının artması hər iki ölkənin iqtisadiyyatındakı perspektivli sahələrin inkişafını daha da sürətləndirəcək.
Şahdəniz qaz-kondensat yatağı 1999-cu ildə kəşf edilib. Layihədə BP-nin 28,8%, Lukoil-in 25,5%, TPAO-nun 19%, SOCAR-ın 10%, NİCO-nun 10%, SGC-nin isə 6,7% payı var. Yataq 2006-cı ildən istismar olunur. 2021-ci ilin 1 avqust tarixinədək yataqdan 147 milyard kub metrə yaxın qaz və 32 milyon tondan çox kondensat hasil edilib. Bu dövrdə hasil edilən qazın təxminən 100 milyard kub metrdən çoxu ixrac edilib.
