Müdafiə Naziri Zakir Həsənov Kəlbəcər və Laçın rayonlarının hərbi hissələrinin qışa hazırlığını yoxlayıb. Bu barədə oktyabrın 21-də Müdafiə Nazirliyindən məlumat verilib.
Hərbi hissələrdə yataqxana və xidməti otaqlar fasiləsiz istilik sistemi ilə təmin edilib, silah və texnikanın payız-qış mövsümünə keçidi təşkil olunub. Hərbi qulluqçuların ərzaq və isti geyimlə təminatı normaya uyğun şəkildə icra edilib. Yüksək dağlıq və sərt iqlim şəraiti olan bölmələrə normadan əlavə təminat və təchizat vasitələri ayrılıb.
Bildirilib ki, şəxsi heyətin hər növ mebel və inventarla təmin olunmuş yeni modul tipli konteynerlərdən ibarət yaşayış məntəqələrinin quraşdırılması işləri davam etdirilir.
Müdafiə naziri Azərbaycan Ordusunda şəxsi heyətin təzə və yüksək kalorili qida ilə fasiləsiz təmin olunması, yaşayış məntəqələrinin inşa edilməsi üzrə görülən işlərin sürətləndirilməsi və hərbi qulluqçuların sosial-məişət şəraitinin daim yaxşılaşdırılması ilə bağlı müvafiq tapşırıqlar verib.
[URIS id=10910]
