Martın 10-u saat 19:45-dən martın 11-i saat 08:35-dək Azərbaycan Ordusunun mövqeləri müxtəlif istiqamətlərdən fasilələrlə atəşə məruz qalıb. Bu barədə Müdafiə Nazirliyi məlumat yayıb.
Füzuli, Xocavənd, Ağdam və Xocalı rayonları Rusiya sülhməramlılarının müvəqqəti yerləşdiyi Azərbaycan ərazisindəki qanunsuz erməni silahlı dəstəsi tərəfindən atəşə tutulub.
Bundan başqa, Ermənistan silahlı qüvvələri Kəlbəcər rayonunda yerləşən Azərbaycan Ordusunun mövqelərini atəşə tutub. Atəş Ermənistanın Basarkeçər rayonundan açılıb.
Azərbaycan Ordusunun sıralarında şəxsi heyət və texnika baxımından itki yoxdur.
“Bölmələrimiz tərəfindən qeyd olunan istiqamətlərdə adekvat cavab tədbirləri görülüb. Hazırda bu istiqamətlərdə vəziyyət sabitdir”, - deyə əlavə olunub.
