Azərbaycanın beynəlxalq axtarışa verdiyi Maqsud Mahmudovun cinayət işi üzrə məhkəmə iclasında zərərçəkmişlər ifadə verib. Bu haqda 14 mart tarixində Report məlumat yayıb.
Dindirilən Xalidə Hüseynova bildirib ki, o, sözügedən şəxsə məxsus lambarda qızıllarını girov qoyub, daha sonra isə zinət əşyalarını geri ala bilməyib.
“Pulu qaytarıb qızıllarımı almaq istəyəndə dedilər ki, Maqsud onları götürüb ölkədən qaçıb. Şikayətimdən təxminən 14 gün sonra Mədinə İsrafilova qızıllarımı qaytardı. Maqsudla bağlı heç bir şikayətim yoxdur", - deyə o bildirib.
Digər zərərçəkmişlər Hicran Məmmədova və Samirə Abdullayeva eyni çətinliklə üzləşib. Onların da qızılları 1-2 aydan sonra geri qaytarılıb.
Qeyd edək ki, təqsirləndirilən şəxs 2020-ci ilin yanvar ayının 10-dan “dələduzluq külli miqdarda ziyan vurmaqla törədildikdə” maddəsilə beynəlxalq axtarışa verilmişdir. Mahmudov Ukrayna ərazisində yaxalanıb və sentyabrın 18-də Azərbaycana gətirilərək istintaqa təhvil verilib. İş üzrə müğənnilər Afət Fərmanqızı və Vasif Məhərrəmli də olmaqla 91 zərərçəkmiş tanınıb.
