Peru Jurnalistlər Federasiyasının vitse-prezidenti Rikardo Sançes noyabrın 7-də Federasiyanın səhifəsində “Qarabağın Azərbaycan tərəfindən azad edilməsindən bir il ötür” adı altında məqalə dərc edib.
Məqalədə Azərbaycanın 30 ilə yaxın işğalda saxlanılmış torpaqlarının Ermənistan tərəfindən xarabalığa çevrilməsi və oradakı yaşayış infrastrukturunun darmadağın edilməsi barədə məlumat verilib.
Müəllif işğaldan azad olunmuş ərazilərə səfəri zamanı erməni vandalizminin şahidi olduğunu bildirib. O, həmçinin Ermənistanın mina xəritələrini verməkdən imtina etməsini və bununla da həmin ərazilərdə Azərbaycanın apardığı bərpa işlərinə mane olmasını qeyd edib.
Bununla yanaşı, Meksikanın “24 horas” gündəlik qəzeti noyabrın 8-də Azərbaycanın oradakı səfirinin Vətən müharibəsi haqqında müsahibəsini paylaşıb.
Müsahibədə Azərbaycanın qələbəsi, işğaldan azad edilmiş ərazilərdə görülən işlər, ermənilərin törətdiyi müharibə cinayətləri və bölgədəki kütləvi dağıntılar və minalama müzakirə olunub. Məqalədə, həmçinin Şuşa şəhəri haqqında məlumat verilib.
