Xarıbülbül gülü Azərbaycanda İkinci Qarabağ müharibəsində Şəhid olan əsgərlərin xatirəsinin rəmzi olaraq və ordumuzun zəfər simvolu kimi qəbul edilib. Hazırda sözügedən simvolu aksesuarların, geyimlərin və istifadə etdiyimiz digər əşyaların üzərində görə bilərik. Bəs Xarıbülbülün corabların üzərində əks olunması nə qədər düzgündür? Məsələ ilə bağlı 2 yanvar tarixində Sputnik Azərbaycan reportaj hazırlayıb.
Azərbaycan Respublikasının xalq şairi, Milli Məclisin deputatı Sabir Rüstəmxanlı məşhurlaşmış Xarıbülbül simvolunun geyimlərdə əks olunmasını müsbət qarşılayıb: “Xarıbülbül deyəndə Qarabağ yada düşür. Azərbaycan xalqı üçün bu gül çox böyük əhəmiyyət kəsb edir. Qələbəmizin simvolunu ürəyimizin üstünə vurmalıyıq. Necə ki, fəxri döş nişanlarımızı sinəmizin üstünə taxırıq, Xarıbülbülü də elə etməliyik”.
Lakin millət vəkili vurğulayıb ki, bu rəmzdən istifadə edərkən çox diqqətli olmalıyıq: “Onu coraba, ayaqqabıya, salfetə vurmaq olmaz".
Məsələ ilə bağlı paytaxt sakinlərinin də fikirləri öyrənilib. Respondentlərin əksəriyyəti Xarıbülbül şəklinin geyimlərdə istifadə olunmasını qəbahət görməsə də, birmənalı olaraq onun corab, salfet və ayaqqabı kimi əşyalarda əks edilməsini mənfi qarşılayıb.
