Azərbaycanda 2022-ci ildən minimum aylıq əməkhaqqı 250 manatdan 300 manata qaldırılacaq. Bu, "Azərbaycanın 2022-ci il dövlət büdcəsi haqqında" qanun layihəsində əks olunub. Qanuna olunan dəyişikliyin məqsədi 1 milyon 600 min nəfər vətəndaşın sosial rifahının yaxşılaşdırılmasıdır. Bəs minimum əməkhaqqı artımından kimlər faydalanacaq?
İqtisadçı-ekspert, millət vəkili Vüqar Bayramov noyabrın 11-də Sputnik Azərbaycan-a bildirib ki, minimum əməkhaqqının artırılması həm dövlət, həm də özəl sektora şamil olunur: “Sahibkarlar 300 manatdan az öz işçilərinə əməkhaqqı ödəyə bilməzlər".
Vüqar Bayramovun sözlərinə görə, minimum əməkhaqqının artması xüsusən ictimai işlərdə çalışanlara təsir edəcək. “İctimai işlərdə çalışan vətəndaşlarımızın böyük qismi minimum əməkhaqqı səviyyəsində maaş alırlar. O baxımdan burada vacib məqamlardan biri məhz həmin şəxslərin də gəlirlərinin artmasıdır”, - deyə deputat əlavə edib.
Sonuncu dəfə minimum əməkhaqqı 2019-cu ilin sentyabrında 180 manatdan 250 manata qaldırılıb.
