Şəmkir rayonunun Ələsgərli kəndində həyat yoldaşını və baldızını bıçaqlamaqda təqsirləndirilən şəxsə Gəncə Ağır Cinayətlər Məhkəməsində hökm oxunub. O, 1 il 6 ay müddətinə azadlıqdan məhrum edilib. Bu barədə yanvarın 8-də Report məlumat verib.
Daha öncə, 2021-ci ilin 26 may tarixində saat 16:00 radələrində 44 yaşlı şəxs mübahisə zəminində 34 yaşlı həyat yoldaşını və onun 32 yaşlı bacısını bıçaqlayıb. Yaralılar xəstəxanaya yerləşdiriliblər.
Saxlanılan şəxs “qəsdən sağlamlığa ağır zərər vurma, iki və ya daha çox şəxsə qarşı, habelə təkrar və ya bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən törədildikdə” və “qəsdən sağlamlığa ağır zərər vurma, xüsusi amansızlıqla, o cümlədən zərərçəkmiş şəxsə ağır iztirablar verməklə və ya sifarişlə, habelə təqsirkar üçün aşkar surətdə köməksiz vəziyyətdə olan şəxsə qarşı törədildikdə” maddələri ilə ittiham olunub.
