Binə qəsəbəsi Südçülük Sovxozu ərazisində yaşayan, əvvəllər məhkum olunmuş Lənkəran şəhər sakini Anar İsmayılov və onun başçılıq etdiyi dəstənin 5 üzvü saxlanılıb. Bu haqda aprelin 23-də APA Daxili İşlər Nazirliyinə istinadən məlumat verib.
Anar İsmayılovun evindən satış məqsədi ilə əldə etdiyi 1 kiloqramdan artıq heroin, F-1 əl qumbarası, “Lankaster” markalı tüfəng, “Makarov” konstruksiyalı tapança və 25 patron aşkarlanıb. Onunla birlikdə saxlanılan şəxslərdə müxtəlif növ narkotiklər tapılıb.
Dəstə üzvlərinin Bakıda çoxlu sayda oğurluq etdikləri də müəyyən edilib. Həmçinin onlar Anar İsmayılovun tapşırığı ilə ticarətlə məşğul olan şəxslərə hədə-qorxu gələrək pul tələb ediblər.
Faktlarla bağlı cinayət işi başlanılıb. Saxlanılan şəxslər barəsində həbs qətimkan tədbiri seçilib.
Sözügedən şəxslərin əməllərindən zərərçəkən digər vətəndaşlar varsa ərazi polis orqanlarına, "102" Xidməti-Zəng Mərkəzinə və Nazirliyin sosial şəbəkələrdəki rəsmi səhifələrinə məlumat verə bilərlər.
