Rabitə Nazirliyi e-poçt üzərindən göndərilən saxta məktublarla bağlı vətəndaşları xəbərdar edib. Bu barədə oktyabrın 8-də Nəqliyyat, Rabitə və Yüksək Texnologiyalar Nazirliyi məlumat yayıb.
Belə ki, vətəndaşlara göndərilən saxta məktublarda guya Azərbaycan, Türkiyə və Gürcüstan hərbçilərinin iştirakı ilə müxtəlif hərbi təlimlərin keçirildiyi bildirilir. Qeyd olunur ki, həmin təlimləri canlı izləmək üçün proqram hazırlanıb. Daha sonra istifadəçiyə link təqdim olunur və proqramın yüklənilməsi istənilir. Həmin keçiddə isə zərərverici proqramlar yerləşdirilir və o proqramı yükləyən istifadəçinin cihazı yoluxur.
Nazirlik bildirir ki, məktubdakı məlumatlar həqiqəti əks etdirmir. Bu kimi məktubların məqsədi istifadəçilərin fərdi məlumatlarını ələ keçirməkdir.
E-poçtdan təhlükəsiz istifadəyə dair təlimat Nazirliyin səhifəsində yerləşdirilib.
Vətəndaşlardan xahiş olunur ki, bu kimi hallarla üzləşdikdə [email protected] elektron poçt ünvanı vasitəsilə Elektron Təhlükəsizlik Xidmətinə müraciət etsinlər.
