2009-cu il aprelin 30-da səhər saatlarında keçmiş Azərbaycan Dövlət Neft Akademiyasının ikinci korpusunda çoxsaylı insanın ölümü ilə nəticələnən qətliam baş verib. Terror zamanı 12 nəfər öldürülüb, 10 nəfərdən çox insan isə yaralanıb. Ölənlər sırasında tələbələr, professor, dosent, laboratoriya müdiri, laborant və Akademiyaya süd məhsulları gətirən Salyan rayon sakini olub. Yaralıların 3-ü isə xarici tələbə olub.
Hadisə zamanı vəfat edən professor Ramiz Abdullayev həmin gün halı pisləşdiyindən evə getmək üçün icazə alıbmış. O, Akademiyanın dəhlizində qatillə rastlaşır və öldürülür. Terror zamanı ən çox güllə xasarəti alan tələbə Savalan Cabbarov həmin ali məktəbdə təhsil alan bacısını xilas etmək üçün dəhlizə çıxaraq terrorçu ilə rastlaşır. 18 gün əvvəl toyu olan laborant Şəfa Məmmədova da kabinetdən çıxarkən terrorun qurbanı olur.
Terror aktı Gürcüstan vətəndaşı, 1980-ci il təvəllüdlü Fərda Qədirov tərəfindən törədilib. Həmin gün qatil, universitetə daxil olaraq binanın birinci mərtəbəsindən altıncı mərtəbəsinədək qarşısına çıxan şəxslərə “Makarov” tipli tapançadan atəş açıb, sonra isə özünü öldürüb.
Neft Akademiyasında törədilən kütləvi qətllə bağlı məhkəmə keçirilib, hadisənin digər iştirakçıları: Cavidan Əmirov, Nadir Əliyev, Arif Qabulov və Nəcəf Süleymanov cəzalandırılıblar. Onlardan Arif Qabulov 11 il müddətinə, digərləri isə ömürlük azadlıqdan məhrum ediliblər.
