Neftçala şəhərində yaşayış binasının dam örtüyündə yanğın baş verib. 30 nəfər bina sakini təhlükəsiz əraziyə təxliyə olunub. Bu haqda dekabrın 13-də Fövqəladə Hallar Nazirliyi (FHN) məlumat yayıb.
İnsident Heydər Əliyev prospekti ünvanında beşmərtəbəli evdə qeydə alınıb. Hadisə yerinə FHN-nin bölmələri cəlb olunub. Yanğın məhdudlaşdırılaraq söndürülüb.
Nəticədə damda quraşdırılmış 5 ədəd plastik su çəni və yanar konstruksiyaları yanıb. Dam örtüyünün qalan hissəsi və mənzillər yanğından mühafizə olunub.
FHN-nin hesabatına əsasən, Azərbaycanda bu ilin 9 ayı ərzində 1 805 yanğın hadisəsi olub. Həlak olanların sayı 24, yaralananların sayı isə 104 təşkil edib. Vəfat edənlərin sayı ötən ilin eyni dövrü ilə müqayisədə 25% azalıb.
