Azərbaycanda ərzaq məhsullarının qiymətlərinin artmasına ticarət tərəfdaşımız olan ölkələrdə müşahidə olunan yüksək inflyasiya təsir edib. Bu barədə iyunun 20-də iqtisadiyyat nazirinin müavini Sevinc Həsənovaya istinadən APA məlumat verib.
Nazir müavininin sözlərinə görə, dünyada ərzaq qiymətlərinin bahalaşmasına səbəb kimi pandemiyanı, Rusiya və Ukrayna arasında baş verən münaqişəni və enerji daşıyıcılarının bahalaşmasını göstərmək olar.
Bəs dünyada ərzaq qiymətlərinin kəskin bahalaşmasının ölkəmizə mənfi təsirinin qarşısını almaq üçün hansı addımlar atılıb?
“Nazirlər Kabinetinin qərarı ilə bir sıra malların istehsalı rüsumdan azad edilib. Həmin məhsulların əlavə dəyər vergisindən azad edilməsi istiqamətində təkliflər hazırlanaraq təqdim olunub”, - deyə S.Həsənova bildirib.
O qeyd edib ki, qarabaşaq və çörəyin qiymətlərində qanun pozuntularının qarşısını almaq məqsədilə zəruri tədbirlər görülüb.
“İstehlak səbətinə daxil olan bir sıra ərzaq məhsullarının ölkə ərazisindən çıxarılmasının tənzimlənməsini nəzərdə tutan qərarlar qəbul edilib”, - nazir müavini əlavə edib.
Xatırladaq ki, Azərbaycada 2022-ci ilin 5 ayı ərzində inflyasiya 12,6% təşkil edib. 2021-ci ildə isə orta illik inflyasiya 6,7% olub.
