Ombudsman Səbinə Əliyeva Ermənistanın Azərbaycanla sərhəddə törətdiyi təxribatla əlaqədar beynəlxalq təşkilatlara müraciət edib. Bu haqda yanvarın 12-də Sputnik Azərbaycan məlumat paylaşıb.
Məlumata əsasən, S.Əliyeva beynəlxalq və regional təşkilatları Ermənistanın regionda törətdiyi insan hüquqları pozuntularına reaksiya verməyə, sülhün və inkişafın təmin edilməsinə təhlükə yaradan hərəkətlərin qarşısının alınmasına yönəlmiş tədbirlər görməyə çağırıb.
“Biz fundamental insan hüquqlarının pozulmasına yönəlmiş bütün hərbi əməliyyatların həyata keçirilməsini pisləyirik və Ermənistandan Azərbaycanın ərazi bütövlüyünə hörmət etməsini tələb edirik”, - deyə Ombudsman vurğulayıb.
Daha öncə, yanvarın 11-də Kəlbəcər rayonu istiqamətində Ermənistan Silahlı Qüvvələrinin törətdiyi təxribat nəticəsində bir Azərbaycan hərbçisi şəhid olub.
