Bakının Suraxanı rayonunda orta məktəbdən, avtomobillərdən və evlərdən oğurluq edən üç şəxs saxlanılıb. Bu haqda 12 yanvar tarixində Daxili İşlər Nazirliyindən məlumat verilib.
Həyata keçirilən əməliyyat zamanı, Yeni Günəşli qəsəbəsində avtomobillərdən oğurluq edən, əvvəllər məhkum olunmuş iki paytaxt sakini saxlanılıb. Müəyyən edilib ki, onlar 7 avtomobilin şüşəsini qıraraq salondan maqnitafon və digər qiymətli əşyaları oğurlayıblar.
Həmçinin bu şəxslərin Suraxanı rayonundakı məktəbdən kompüter avadanlıqları və 1 ədəd velosiped oğurladıqları sübuta yetirilib.
Keçirilən digər əməlliyat zamanı Əmircan qəsəbəsində evlərdən oğurluq edən şəxs saxlanılıb. Müəyyən edilib ki, o, 4 evdən pul, qızıl-zinət və məişət əşyaları götürüb.
Hər iki faktla bağlı araşdırmalara başlanılıb.
Bu şəxslərin əməllərindən zərərçəkən varsa, məsələ barədə Suraxanı Rayon Polis İdarəsinə, “102” Xidməti-Zəng Mərkəzinə və Nazirliyin sosial şəbəkələrdəki rəsmi hesablarına məlumat verə bilər.
