Aprelin 2-dən Azərbaycanda Ramazan ayı başlayıb. Bu müqəddəs ayın gəlişi ilə dünya müsəlmanları oruc tutmağa başlayır. Bəs oruc haqqında yayılan hansı stereotiplər mövcuddur?
Bir çox insanları maraqlandıran suallardan biri odur ki, oruc zamanı çimmək və ya duş qəbul etmək olar, ya yox. Oruc tutma qaydalarına əsasən, baş bütünlüklə suyun altına salınmazsa, çimmək olar.
Bundan əlavə, onu da qeyd etmək lazımdır ki, insanın ağız suyunu (tüpürcəyini) udması da orucu batil etmir. Eyni zamanda, oructutanlar ağızı yaxalaya və dişlərini təmizləyə də bilərlər. Lakin burada suyun boğazdan aşağı getməməsi üçün diqqət etmək lazımdır.
Oruc zamanı səhvən nəsə yemək və ya içmək də orucu pozmur. Həmin insan qida qalığını ağız boşluğundan çıxararaq oruca davam edə bilər.
Əksər insanların düşündüklərindən fərqli olaraq, Ramazan ayı boyunca toy etməklə bağlı da bir məhdudiyyət yoxdur.
Bəs bir insan namaz qılmırsa, oruc tuta bilərmi? Namaz da oruc kimi İslam dininin beş vacibatlarından biridir. Lakin onlar bir-birindən asılı deyillər. Yəni namaz qılmadan da oruc tutmaq olar.
Xatırladaq ki, Azərbaycanda Ramazan bayramı dövlət səviyyəsində iki gün – mayın 2-si və 3-ü qeyd olunacaq.
