Paytaxtın Nizami rayonunda özünü “Azərsu” ASC-nin əməkdaşı kimi təqdim edərək vətəndaşlardan pul alan şəxs peyda olub. Bu barədə Cəmiyyətin rəsmi səhifəsində aprelin 25-də məlumat verilib.
Sözügedən şəxs sahibkarlardan su sayğacının quraşdırılması və dəyişdirilməsi müqabilində pul tələb edirmiş. Belə ki, o, R.Rüstəmov 50A ünvanında yerləşən özəl uşaq bağçasına 80 manata su sayğacının quraşdırılmasını təklif edib. Bağçanın rəhbərliyi məsələ ilə bağlı rayon Sukanal İdarəsinə müraciət edib. Araşdırma nəticəsində onun kamera görüntüləri əldə olunub. Hələlik şübhəlinin şəxsiyyəti müəyyənləşdirilməyib.
Azərsu vətəndaşlara müraciət edib: “Xidməti vəzifələrini yerinə yetirən əməkdaşlardan vəsiqə tələb edilməli, heç bir halda onlara nağd pul ödənilməməlidir”.
Bu kimi qeyri-qanuni əməllərlə rastlaşanlar “955” zəng mərkəzi ilə əlaqə saxlaya bilərlər.
