“Pay torpaqlarında ev və ya obyekt tikintisi aparıla bilməz”. Bunu 30 mart tarixində Daşınmaz Əmlakın Dövlət Kadastrı və Reyestri Publik Hüquqi Şəxsin İdarə Heyətinin sədr müavini Elşad Məmmədov “Xəzər Xəbər”ə bildirib.
Onun sözlərinə görə, pay torpaqları yalnız əkin üçün nəzərdə tutulub.
“50 minə yaxın ailənin pay torpağının sənədi yox idi. Ötən ilin oktyabrında məhz bu torpaqların sənədləşdirilməsi prosesinə start verilib”,- deyə sədr bildirib.
Məlumatda qeyd olunub ki, pay torpaqlarının sənədləşdirilməsi prosesi davam etdirilir və vətəndaşlardan şəxsiyyət vəsiqəsindən başqa, heç bir sənəd tələb olunmur. Bütün rüsumlar isə dövlət hesabınadır.
Qeyd edək ki, pay torpaqları 1990-cı illərdə Azərbaycanda aparılan aqrar islahatlar nəticəsində vətəndaşlara əvəzsiz olaraq verilib və 1,5 milyon vətəndaş pay torpağı ilə təmin edilib.
