Avtomobili olan vətəndaşların ən çox üzləşdiyi problemlərdən biri parkinq məsələsidir. Paytaxtda qanunsuz parkinqlər ləğv olunur, yerlərinə isə yeniləri yaradılmır. Sürücülər parklanma yerlərinin az olduğuna görə nəqliyyat vasitələrini qadağan olunan məkanlarda saxlamalı olurlar və bu səbəbdən tez-tez cərimələnirlər. Məsələ ilə bağlı 11 noyabr tarixində Sputnik Azərbaycan araşdırma aparıb.
Nəqliyyat məsələləri üzrə ekspert Elməddin Muradlının sözlərinə görə, şəhərdə parklanma ilə vəziyyət heç də ürəkaçan deyil: "Şəxsi avtomobilləri olan sürücülərə isə imkan verilmir ki, haradasa avtomobillərini park etsinlər. Bir tərəfdən avtobus zolağı çəkilir və şəxsi avtomobillərin həmin zolaqlara girişinə icazə verilmir. Digər tərəfdən isə parklanma üçün şərait yaradılmır. Onda sual yaranır ki, bu sürücülər avtomobillərini harada park etməlidirlər?"
Ekspertin fikrincə, parkinqlərlə bağlı bir nəzarət mexanizmi yaradılmalıdır və onlara nəzarət edən qurum müəyyənləşməlidir.
“BNA da əvvəl parklanma yeri yaradıb, sonra qanunsuzu ləğv etməlidir ki, insanlar əziyyətə düşməsin, hər gün cərimələnməsinlər", - deyə Elməddin Muradlı bildirib.
Həmçinin məsələ ilə bağlı Memarlıq və İnşaat Universitetinin baş müəllimi Bulud Bağırovun Sputnik Azərbaycan-a fikrini söyləyib: “Ərazidə heç bir parklanma yeri olmadığı halda sürücünü avtomobili saxladığına görə cərimələmək düzgün yanaşma deyil. Bu gün Bakıda çox ciddi parkinq çatışmazlığı var”.
Bakı Nəqliyyat Agentliyinin İdarə Heyətinin sədri Vüsal Kərimlinin sözlərinə əsasən, parklanmanı həyata keçirmək üçün nəqliyyat vasitələrinin kimə aid olduğu, harada qeydiyyatdan keçdiyi, insanların hansı ünvanlarda yaşaması kimi məlumatlar şərtdir. Bu məlumatlar toplanıldıqdan sonra parkinqnən bağlı yeni layihənin həyata keçirilməsi planlaşdırılır. İlkin pilot layihə 6-cı Paralel küçəsində tətbiq ediləcək.
