Bakının Səbail rayonunda narkotik vasitələrin dövriyyəsi ilə məşğul olan 2 nəfər saxlanılıb. Bu haqda Baş Narkotiklərlə Mübarizə İdarəsi noyabrın 2-də məlumat yayıb.
İlk olaraq paytaxt sakini Elvin Bədəlov Badamdar qəsəbəsində narkotik satarkən tutulub. Onun üzərində marixuana və psixotrop maddə metamfetamin aşkar edilib. O, ifadəsində narkotikləri Ruhin adlı şəxsdən aldığını deyib.
Əməliyyat nəticəsində Oğuz rayon sakini Ruhin İbrahimov da polis tərəfindən saxlanılıb. Onun yaşadığı evdən 4 kiloqramdan artıq marixuana tapılıb.
Faktla bağlı istintaq tədbirləri davam etdirilir.
DİN-in məlumatına əsasən, bu ilin 9 ayı ərzində 2,7 ton narkotik aşkar olunaraq dövriyyədən çıxarılıb. Ümumilikdə narkotiklə bağlı 6 420 fakt qeydə alınıb.
