Paytaxtda küləyin fəsadlarından 6-sı qadın olmaqla 11 nəfər müxtəlif dərəcəli bədən xəsarətləri alıb. Bu barədə noyabrın 11-də Səhiyyə Nazirliyindən məlumat verilib.
Xəsarət alanlardan 9 nəfər xəstəxanadadır.
Dövlət Yol Polisi İdarəsindən Report-a verilən məlumata görə, 4 yük avtomobili küləyin təsirindən aşıb. Nəticədə avtomobillərə maddi ziyan dəyib.
Həmçinin külək parlament binasının fasadının bir hissəsini qoparıb.
Külək nəticəsində Bakıda 11 məktəbə ziyan dəyib. Məktəblərin dam örtüyü, pəncərə, fasad və hasarlarında bir sıra fəsadlar yaranıb.
Güclü külək səbəbindən aşan ağacların sayı isə 70-i keçib. Aşan ağaclar 10 avtomobilə ziyan vurub.
Qeyd edək ki, noyabrın 10-dan ölkə ərazisində qeyri-sabit hava şəraiti müşahidə olunur. Belə hava şəraitinin noyabrın 12-dək davam edəcəyi gözlənilir. FHN vətəndaşları təhlükəsizlik qaydalarına riayət etməyə və yalnız zəruri hallarda küçəyə çıxmağa çağırıb.
