Bakının Pirallahı rayonunda baş verən qadın qətlinin təfərrüatı açıqlanıb. Bu haqda Xəzər Xəbər noyabrın 12-də məlumat yayıb.
Məlum olub ki, qətl mərhumun anasının gözləri qarşısında baş verib. Qadının iddiasına görə, qızının ailəsində mübahisələr olduğundan son vaxtlar 3 uşaqdan biri atasının yanında, digərləri isə anası ilə birlikdə qalırmış.
Onun sözlərinə əsasən, ö gün qızının əri Əsgər Musayev zəng vuraraq onunla yaşayan övladının anası tərəfindən aparılmasını istəyib. “Uşağı götürdük. Taksiyə minib geri qayıdarkən Əsgər bizə tərəf gələrək qızımı əli ilə vurmağa başladı”, - deyə zərərçəkmişin anası söyləyib.
İddiaya görə, qadın avtomobildən düşərək qaçmağa çalışarkən əri onun boğaz nahiyəsinə bıçaqla xəsarət yetirib. O, xəstəxanaya aparılsa da, xeyli qan itirdiyindən dünyasını dəyişib.
Baş Prokurorluğun yaydığı məlumatda bildirilir ki, hadisə noyabrın 10-u saat 17 radələrində Pirallahı qəsəbəsində qeydə alınıb. Əsgər Musayev 24 yaşlı həyat yoldaşının boğazını kəsərək öldürməkdə şübhəli bilindiyi üçün saxlanılıb.
Bu ilin yanvar-iyun ayları ərzində 821 nəfər məişət zorakılığına məruz qalıb. Rəsmi hesabatlara görə, müvafiq dövrdə qeydə alınmış adam öldürmə cinayətləri nəticəsində 33 qadın qətlə yetirilib.
Vətəndaşlar qadına qarşı zorakılıq halları ilə üzləşdikdə Baş Prokurorluğun “961” Çağrı Mərkəzinə müraciət edə bilərlər.
