Məhkəmə deputat toxunulmazlığı ləğv edilən Eldəniz Səlimova cəza verib. Hökmə əsasən, o, 3 il 6 ay azadlıqdan məhrum edilib. Bu haqda dekabrın 27-də APA məlumat yayıb.
Həmçinin bildirilib ki, sözügedən şəxs 2 il 6 ay müddətinə vəzifə tuta bilməz. Ötən prosesdə prokuror onun 4 il azadlıqdan məhrum edilməsini istəyib.
Qeyd edək ki, hadisə bu ilin iyulun 29-da baş verib. Milli Məclisinin deputatı Xaçmazda yerləşən “Starıy Dvor” restoranında karantin qaydalarına uyğun olaraq obyektin bağlanmasını tələb edən polis leytenant Zaur Mirzəyevə zor tətbiq edib. O, zərərçəkmişin sifət və baş nahiyəsinə yumruq və başı ilə zərbələr endirib.
Eldəniz Səlimov “vəzifə səlahiyyətlərini aşma” maddəsi ilə ittiham olunub.
