Qəbələdə 23 yaşlı Aytac Əliyevanın qətlinə görə onun ərinin sevgilisi də saxlanılıb. Bu barədə 9 mart tarixində Baş Prokurorluq məlumat yayıb.
İnsident martın 5-i baş verib. 1993-cü il təvəllüdlü Rüfanə Nəbiyeva mərhumun əri ilə 6 ilə yaxın münasibətdə olub. Kişi öz həyat yoldaşı ilə boşanaraq onunla ailə quracağına söz verib, lakin sözünə əməl etməyib.
Buna görə Aytac Əliyevanın ərinə guya xəyanət etmək üçün evi tərk etməsi görüntüsü yaratmaq məqsədilə həmin şəxsin rəfiqəsi Kəmalə Maksumbəyova və 14 yaşlı oğlu onu oğurlayıblar. Cinayətkarlar zərərçəkmişi Şəkidəki evlərinə aparıb orda saxlayıblar. Onlar niyyətdən kənara çıxaraq qadını öldürməkdə şübhəli bilinirlər.
Rüfanə Nəbiyeva tutularaq istintaqa cəlb edilib. Kəmalə Maksumbəyova “qəsdən adam öldürmə”, “adam oğurluğuna cəhd” və “yetkinlik yaşına çatmayanı cinayətkar fəaliyyətə cəlb etmə” maddələrilə ittiham edilib.
