Ali təhsil müəssisələrinə qəbul imtahanlarının II mərhələsi üzrə növbəti sınaq imtahanına qeydiyyat başlayıb və 2 fevral saat 23:59-dək aparılacaq. Bu barədə yanvarın 12-də Dövlət İmtahan Mərkəzi məlumat yayıb.
3 saat davam edəcək imtahan fevralın 13-də Bakı, Sumqayıt, Naxçıvan, Gəncə, Şəmkir, Şəki, Bərdə, Göyçay, Şirvan, Xaçmaz və Lənkəranda baş tutacaq. Sınaqda test tapşırıqları hər qrupda 3 fənn üzrə aşağıdakı kimi təqdim olunacaq:
| I qrup | II qrup | III qrup
DT altqrupu | III qrup
TC altqrupu | IV qrup |
| Riyaziyyat | Riyaziyyat | Azərbaycan (rus) dili | Azərbaycan (rus) dili | Biologiya |
| Fizika | Coğrafiya | Tarix | Tarix | Kimya |
| Kimya | Tarix | Ədəbiyyat | Coğrafiya | Fizika |
III ixtisas qrupu üzrə həm DT, həm də TC altqrupları üzrə imtahan vermək istəyənlər üçün coğrafiya fənni üzrə əlavə imtahan fevralın 20-də Bakı, Naxçıvan, Gəncə və Lənkəranda coğrafiya fənni üzrə sınaq keçiriləcək.
Suallar 11-ci siniflər üçün tədris proqramlarının 2022-ci il yanvar ayının sonunadək olan hissəsini əhatə edəcək. Abituriyentlərə hər fənn üzrə 30 test tapşırığı təqdim olunacaq. Onlardan 22-si qapalı, 8-i isə açıq formalı olacaq. İmtahanda iştirak etmək üçün abituriyentlər “Şəxsi kabinet”in “Hesab” bölməsinə 40 manat yükləməlidirlər. Coğrafiya fənnindən əlavə imtahan üçün isə 15 manat ödənilməlidir.
Nəticələr ən tezi 2 həftədən sonra elan olunacaq. İştirakçılara imtahanda topladıqları ballar 400 ballıq şkala üzrə təqdim olunacaq.
Abituriyentlərin nəzərinə çatdırılıb ki, imtahana buraxılış yalnız abituriyentlərin şəxsiyyət vəsiqəsinin əsli, “İmtahana buraxılış vərəqəsi” və “İmtahan iştirakçısının sağlamlığı haqqında” bəyannamə ilə mümkün olacaq.
