Ölkədə son zamanlar zərgərlik məmulatlarının satışında saxtakarlıq halları müşahidə olunur. Məsələ ilə bağlı 23 oktyabr tarixində Oxu.az araşdırma aparıb.
“Hazırda bəzi dələduzlar süni daşları “təbii” adı ilə istehlakçıya təqdim edirlər. Daşların xüsusi xarakteristikası, onların şəffaflığı və s. meyarlar var ki, bunu istehlakçı görmür. Sadəcə xüsusi zərgərlik lupaları vasitəsilə bunu müəyyən etmək olur”, - deyə Azərbaycan Zərgərlər Assosiasiyasının İdarə Heyətinin sədri Toğrul Abbasquliyev bildirib.
Sədrin sözlərinə görə, qızılın satışı zamanı edilən əsas saxtakarlıq onun əyarının dəyişdirilməsidir. Belə ki, saxta probla aşağı əyyarlı bir məhsulun yüksək əyyar adı ilə satılma halları baş verə bilər. Belə məmulatlar daha çox sexlərdə hazırlanır və zavod məhsulu kimi alıcılara təqdim olunur. Daha bir saxtakarlıq qızıl ilə radirovka (“qızıl suyu”na salmaq) edilmiş məmulatın sonradan qızıl adı ilə istehlakçıya satılmasıdır.
Digər məqam isə ondan ibarətdir ki, qızılın tərkibinə nəzərdə tutulan həddən çox qatqılar əlavə olunur. Bu zaman qızılın çəkisini artırmaq məqsədi ilə daha çox misdən istifadə edilir.
“Adı, mənbəyi, sənədi və sertifikatı olmayan məhsulları almayın. Məhsulu əldə etdikdə kassa çeki tələb edin”, - Toğrul Abbasquliyev alıcılara tövsiyə edib.
Zərgərlik məmulatlarının istehsalçılarından olan Ağamirzə Məlikov qeyd edib ki, istehlakçılar sözügedən məhsulları əldə edərkən əsas diqqət yetirməli məqamlar onun əyarı, rəngi və parlaqlığıdır: “Hazırda sintetik brilyantlardan istifadə olunur, onlardan istifadə etmək yanlış deyil, lakin bunu müştəriyə “təbii” adı ilə satmaq saxtakarlıqdır”.
