Qızılağac Milli Parkının ərazisində elektrik cərəyanı ilə ov edən şəxs saxlanılıb. Bu barədə fevralın 1-də Daxili İşlər Nazirliyindən məlumat verilib.
Su polisinin keçirdiyi tədbir zamanı parkın ərazisindəki kiçik körfəz su sahəsində elektrik avadanlıqları ilə balıq ovlayan şəxsin Lənkəran rayon sakini olduğu müəyyən edilib.
Həmin şəxsdən qayıq, elektrik avadanlıqları, həmçinin qanunsuz olaraq ovladığı balıqlar götürülüb. Onun təbiətə 1 023 manat dəyərində maddi ziyan vurduğu məlum olub.
Eyni gündə Korçay Dövlət Təbiət Qoruğunun mühafizə rejimini pozan iki nəfər saxlanılıb. Qanun pozucularının Goranboy və Göygöl rayon sakinləri olduqları müəyyən edilib.
Hər iki faktla bağlı araşdırma aparılır.
