Dünən, noyabrın 25-də UEFA Konfrans Liqasının qrup mərhələsinin 5-ci turunun oyunları keçirilib.
“Qarabağ” Kiprin “Omoniya”sı ilə 2:2 heç-heçə edib. Görüşdə ilk hissə qonaqların 0:1 üstünlüyü ilə başa çatıb. İlk qola Duris imza atıb. 2-ci hissədə “Qarabağ” Psaltisin avtoqolu ilə hesabı bərabərləşdirib. 66-cı dəqiqədə Kikonun qırmızı vərəqə alması səbəbindən azlıqda qalan kiprliləri 88-ci dəqiqədə Andrade cəzalandıraraq ağdamlıları hesabda önə çıxarıb. 90-cı dəqiqədə isə Gomes qapıçı Məhəmmədəliyevin önə çıxdığını görərək təqribən 50 metr məsafədən bərabərlik qolunu vurub.
Qrupun digər oyununda “Bazel” səfərdə “Kayrat”a 3:2 hesabı ilə qalib gəlib. Beləliklə, “Qarabağ”la eyni xal toplayan “Bazel” əlavə göstəricilər hesabına qrupda 1-ci yerdədir.
Qrup mərhələsinə dekabrın 9-da yekun vurulacaq. Son turda “Qarabağ” “Bazel”in qonağı olacaq. Xatırladaq ki, Qurban Qurbanovun yetirmələri pley-off mərhələsində iştirakını artıq təmin edib. Ağdamlılar qrupda 1-ci yeri tutsa birbaşa ⅛ finala, 2-ci yerdə qalsa isə 1/16 mərhələsində öz güclərini sınayacaq.
