Azərbaycanda qışda istirahət etmək üçün bir çox rayonlarımıza üz tutmaq olar. Həmin rayonlardakı hotellərin qiymətləri baha olduğundan qış turizmi əhali üçün əlçatmaz olur. Lakin bahalı istirahət mərkəzlərində dincəlmək yeganə çıxış yolu deyil. İnsanoid qış aylarında ölkəmizin bölgələrində dincəlməyin sərfəli yollarını araşdırıb.
Qubaya avtobus səyahətinin qiyməti 4 manat təşkil edir. Burada Çənlibel gölü, dağ arası kəndlər və şəlalələr yerləşir. Adambaşı otağın qiyməti 70 manatdan başlayır.
Qusara biletin qiyməti 4,2 manat təşkil edir. Bir nəfərlik gecələmək üçün otağın qiyməti isə 50 manatdan başlayır. Azərbaycanın ən uca nöqtəsi, Bazardüzü dağı, Şahnabaz və Laza şəlalələri, Şeyx Cüneyd məqbərəsi və qədim məscidlər burada yerləşir.
Qusarda, həmçinin “Şahdağ” turizm kompleksi fəaliyyət göstərir. Bir günlük tur ortalama 50 manata başa gəlir. Bu qiymətə kanat yolları, macəra parkı, kvadrasikl və xizək kirayəsi daxildir.
Təbii iqlim şəraiti və mineral bulaqları ilə seçilən Qəbələyə bilet 7,6 manatdır. Bir nəfərlik gecələmək üçün otağın qiyməti 50 manatdan başlayır. Bazardüzü zirvəsi, ən hündür dağ gölü olan Tufangöl, ən hündür şəlaləsi olan Mucux burada yerləşir. Həmçinin Qəbələdə Şabalıd meşəsi, Nohur gölü və Yeddi gözəl şəlaləsi var. Sözügedən bölgədə 18-ci əsrə aid Cümə məscidini və 4-cü əsrə aid alban məscidini də ziyarət etmək olar.
Bununla yanaşı, Qəbələdə “Tufandağ” qış turizm mərkəzi yerləşir. Mərkəzdə kanatla gəzintilər, xizək sürmə və digər əyləncə xidmətləri təklif olunur.
Ümumi ərazisi 16 hektar olan “Qəbələnd” attraksion parkı da burada yerləşir. Park 40-dan çox əyləncə obyektindən ibarətdir. Kompleksə giriş qiyməti 10-15 manatdır. Lakin kartinq üçün əlavə 10 manat ödəniş olunmalıdır.
Qaxa biletin qiyməti 9,6 manatdır. Burada evlərin qiyməti bir gecə üçün 30-60 manat arasında dəyişir. Qiymətə yalnız evlərdə gecələmə daxildir. Sözügedən dağlıq ərazidə 17-18-ci əsrlərdə gözətçi qalası məqsədilə tikilmiş Sumuq qala və qış aylarında donan şəlalələr yerləşir.
Həmçinin Qaxda “Snow Tubing Park Ilisu” kompleksi mövcuddur. Parkın ərazisində 5 sürüşmə zolağı var. Zolaqların 3-ü böyüklər, 2-si isə uşaqlar üçün nəzərdə tutulub. Ən uzun məsafə 150 metr, ən qısa məsafə isə 72 metr təşkil edir. Kompleksə giriş 35 manatdır.
İsmayıllı İvanovka, Qalacıq, Basqal və Lahıc kəndləri ilə məşhurdur. Buraya getmək üçün biletin qiyməti 6,20 manatdır. Evlərdə bir otağın qiyməti isə 40 manatdan başlayır.
