Qazaxıstan Avropaya ixrac etdiyi yüklərin Transxəzər Beynəlxalq Nəqliyyat Marşrutu ilə daşınmasını Azərbaycana təklif edib. Bu barədə ölkəmizdə səfərdə olan “Samruk-Kazyna” SC-nin İdarə Heyətinin sədri Almasadam Satkaliyevə istinadən martın 9-da Report xəbər verib.
Hər iki tərəf mövcud marşrutlara alternativ ola biləcək Azərbaycan ərazisindən neft nəqli ilə bağlı mühüm əməkdaşlıq potensialını qeyd edib.
Azərbaycan və Qazaxıstanın rəsmilərinin görüşü zamanı Transxəzər Beynəlxalq Nəqliyyat Marşrutunun inkişafı üzrə birgə müəssisənin yaradılması layihəsi müzakirə edilib. Bu müəssisə tariflərin müəyyən edilməsi və yük bəyannaməsi ilə bağlı məsələləri həll etməyə, vahid İT həlləri tətbiq etməyə və bu marşrut üzrə tranzit yükləri birləşdirməyə imkan verəcək.
Yekun olaraq “Samruk-Kazyna” SC ilə Azərbaycanın Rəqəmsal İnkişaf və Nəqliyyat Nazirliyi arasında birgə müəssisənin yaradılması və nəqliyyat-logistika fəaliyyətinin həyata keçirilməsinə dair protokol imzalanıb.
