Qeyri-qanuni avtovağzal xidməti göstərilən yerlərin fəaliyyəti dayandırılacaq. Bu barədə aprelin 29-da rəqəmsal inkişaf və nəqliyyat nazirinin müavini Rəhman Hümmətova istinadən Report xəbər verib.
"Təəssüf ki, Bakıda Beynəlxalq Avtovağzal Kompleksinin olmasına baxmayaraq, hələ də bir sıra regionlara hərəkət edən nəqliyyat vasitələrinin şəhərin digər nöqtələrində toplaşması halları var. Bu, uzun illər ərzində yaranmış bir problemdir və aradan qaldırılması üçün işlər aparılır", - deyə R.Hümmətov bildirib.
Onun məlumatına əsasən, artıq Şirvan şəhərində qeyri-qanuni fəaliyyət göstərən avtovağzalın, Bakı Beynəlxalq Avtovağzal Kompleksinin qarşısında qanunsuz taksi dayanacaq yerinin fəaliyyəti dayandırılıb.
