Dünən, dekabrın 6-da Qubada "Quba ABAD Factory" qablaşdırma vasitələrinin istehsalı müəssisəsinin açılışı olub. Bu barədə 6 dekabr tarixində Azərbaycan Respublikası Prezidentinin rəsmi səhifəsi məlumat verib.
“ABAD”ın direktoru Rüfət Elçiyevin sözlərinə görə, müəssisənin yerləşdiyi bina memarlıq elementləri qorunmaqla tamamilə yenilənib. Qurulan fabrikdə kartondan müxtəlif qablaşdırma vasitələri, kağız və etiketlərin istehsalı, promo məhsulların hazırlanması, eyni zamanda, tullantı kağızların preslənməsi nəzərdə tutulur. Müəssisədə ilkin mərhələdə 20 nəfər, yekunda isə 50 nəfər işlə təmin olunacaq.
“ABAD” 2016-cı ildə yaradılıb. Cari İlin 10 ayında “ABAD” 500 ailəyə dəstək göstərib. Nəticədə “ABAD”çıların minlərlə çeşiddə sənətkarlıq, kənd təsərrüfatı və digər növ məhsulları satışa çıxarılıb. Ümumilikdə 5,5 milyon manat dəyərində məhsulun “ABAD” vasitəsilə satışı həyata keçirilib.
