İran, Azərbaycan və Gürcüstan ərazisindən keçməklə Fars körfəzini Qara dənizə birləşdirən tranzit marşrutu üzrə sınaq yürüşü başlayıb. Bu barədə dekabrın 23-də Rəqəmsal İnkişaf və Nəqliyyat Nazirliyi məlumat verib.
Avtomobil karvanı İran Biləsuvarından Azərbaycana, daha sonra Gürcüstan limanlarına, oradan Bolqarıstana və quru yolla Şərqi Avropanın digər ölkələrinə hərəkət edəcək.
Ötən gün Azərbaycan, İran və Gürcüstan nəqliyyat vasitələrindən ibarət karvan Təbrizdən yola düşüb, bugün isə Azərbaycana çatıb.
Sınaq yürüşünün nəticələri əsasında marşrutun səmərəliliyi təhlil ediləcək.
Bu dəhliz Azərbaycan üçün strateji əhəmiyyət kəsb edəcək, tranzit yükdaşımalarını və dünya bazarına çıxışı təmin edəcək. Cənubi Asiya ölkələri isə dəhliz vasitəsilə Qərbə daha bir yol əldə edəcəklər.
Sözügedən dəhliz üzərindən dəmir yolu yükdaşımalarının da həyata keçirilməsi mümkün olacaq.
