Azərbaycana İrandan qaçaqmalçılıq yolu ilə narkotik vasitə və güclü təsiredici dərmanların keçirilməsinin qarşısı alınıb. Bu haqda noyabrın 24-də Dövlət Gömrük Komitəsi məlumat yayıb.
Belə ki, İran vətəndaşının idarə etdiyi "Foton" markalı yük avtomobili gömrük nəzarətindən keçən zaman saxlanılıb. Yoxlama zamanı avtomobildən 30 həb "Tamol 225 mg", 4 həb "Tramadol 200" adlı dərman preparatları və 9 qram marixuana aşkar edilib.
Qeyd edək ki, "Tramadol" müvafiq qanunla təsdiq edilmiş "Güclü təsir edən maddələrin və onların külli miqdarının Siyahısı"na daxildir.
Oxşar hadisə noyabrın 15-də baş vermişdir. Gömrük postunda İrandan Azərbaycana hərəkət edən yük avtomobilindən 218 kiloqramdan artıq heroin aşkar edilərək qanunsuz dövriyyədən çıxarılıb.
