İrandan Azərbaycana narkotik keçirmək istəyən şəxslər sərhədçilərə atəş açıb. Bu barədə Dövlət Sərhəd Xidməti və Baş Prokurorluq birgə məlumat yayıb.
Aprelin 4-də Cəbrayıl rayonunun Şıxalıağalı kəndi yaxınlığındakı sərhəddə 6 nəfər silahlı naməlum şəxsin İran-Azərbaycan sərhədini pozmaları müşahidə olunub.
Sərhədçilər tərəfindən havaya xəbərdarlıq atəşi açılıb. Lakin sərhəd pozucuları əmrə tabe olmayıb. Əksinə, odlu silahdan atəş açaraq sərhədçilərin həyatına qəsdə cəhd ediblər.
Sərhəd pozucularından biri zərərsizləşdirilib. Digər 5 nəfər ərazidən uzaqlaşıb. Zərərsizləşdirilmişin İran vətəndaşı olması müəyyənləşdirilib. Ondan Kalaşnikov avtomatı, 32 kiloqram 270 qram narkotik aşkarlanıb.
Hadisə yerindən uzaqlaşan digər sərhəd pozucularının biri də aşkarlanaraq saxlanılıb. Digərlərinin isə axtarışı davam edir.
