Novruz bayramı ilə əlaqədar ölkəmizdə 9 günlük tətil olacaq. Bununla bağlı bir çox insanlar rayonlara üz tutur. Bölgələrə səfər edərkən avtomobilləri icarəyə verən şirkətlərə müraciət edənlər az deyil. İnsanoid Bakıdakı “Rent a Car” şirkətlərindəki icarə müddəti və ümumi qiymətlərlə bağlı araşdırma aparıb. Müqayisə üçün “Hyundaı ix35” markalı avtomobil, marşrut isə Bakı - Quba götürülüb.
“Ram Servis” müştərilərinə 90-dan çox avtomobil çeşidi təqdim edir. Burada avtomobilin icarə müddəti 2-3 günlük olarsa, 1 günün qiyməti 90 manat təşkil edəcək. İcarə şərtlərinə əsasən, 150 manat depozit ödənilməlidir. Minimal yaş həddi kimi 24 yaş göstərilib. Sürücülük təcrübəsi isə ən az 2 il olmalıdır.
Avtomobil parkında 80-dən artıq nəqliyyat vasitəsi olan “AFN”-də adıçəkilən maşın 2-9 günə kirayə götürülərsə, bir gün üçün qiymət 70 manat olacaq. Şirkətin xidmətlərindən istifadə etmək üçün ən azı 2 illik sürücülük vəsiqəniz olmalıdır. Maşın icarə etmək üçün yaş həddi 24-dür. Depozit olaraq 200 manat qoyulmalıdır. Verilən məlumata görə, bayram günlərində avtomobillər minimum 4-5 günə icarəyə verilir.
“Nascar” şirkəti minik avtomobilin icarəsi üçün minimal icarə müddəti 2 gün olmaqla 75 manat istəyir. Depozit məbləği 300 manatdır, yaş tələbi isə 24 yaşdır. Həmçinin müştəridə 2 illik sürücülük təcrübəsinin olması mütləqdir. Lakin maşının markasından asılı olaraq, minimal sürücülük təcrübəsi üzrə tələb dəyişə bilər.
Avtomobilin kirayə müddəti 2-3 gün olmaqla, “Automile”-da 1 gün üçün 70 manat xərcləmək lazımdır. Burada depozit haqqı 200 manat təşkil edir. Şirkətin təqdim etdiyi xidmətdən 23 yaşdan yuxarı hər bir müştəri yararlana bilər. Sürücünün minimum 2 il stajı olmalıdır.
“Karavan” şirkətinə avtomobil icarəsi üçün 24-65 yaşında olan şəxslər müraciət edə bilərlər. Onlarda minimum 2 illik sürücülük təcrübəsi olmalıdır. Depozit 300 manatdır. Maşın 2-6 günlük götürülürsə ödəniş 80 manat olur.
“Best Rent” LLC-də Hyundai ix35-in 1 günlük icarəsi üçün 80 manat ödənilməlidir. Bu avtomobili minimum 3 gün müddətinə götürmək mümkündür. Müştərinin yaşının 21-dən az olmaması və 1 illik sürücülük vəsiqəsinin olması zəruridir. Bu maşının depozit məbləği 200 manatdır.
“Rent a car Baku Azerbaijan”da 70-dən çox nəqliyyat vasitəsi var. Bu şirkətdə minimum icarə müddəti 2 gün olmaq şərtilə maşının kirayəsi 1 günlük 70 manata başa gəlir. Minimum depozit məbləği 300 manatdır. Yaş həddi 24-65 yaşdır. Həmçinin burada ən azı 2 illik sürücülük stajına dair tələb var.
