Kiçik və Orta Biznesin İnkişafı Agentliyinin (KOBİA) təşkilatçılığı ilə Gəncə, Lənkəran, Sumqayıt, Şəmkir, Füzuli və Qubada KOB Fest sərgi-satış yarmarkaları təşkil olunacaq. Bu barədə 29 aprel tarixində İqtisadiyyat Nazirliyinin rəsmi səhifəsində məlumat verilib.
Yarmarkaların məqsədi mikro və kiçik sahibkarlıq subyektlərinin istehsal etdiyi məhsul və xidmətlərin geniş istehlakçı auditoriyasına təqdim edilməsi və satışına dəstək olmasıdır. Festivalda KOB subyektlərinin istehsal etdikləri qida və qeyri-qida məhsulları, sənətkarların və yaradıcı şəxslərin əl işləri təqdim ediləcək. Bununla yanaşı, yerli startaplar da öz məhsul və xidmətlərini təqdim edə bilərlər.
Qeyd edək ki, sərgi-satış yarmarkaları Şəmkirdə 7 may, Gəncədə 9 may, Lənkəranda 14 may, Füzulidə 21 may, Qubada 28 may, Sumqayıtda isə 30 may tarixlərində keçiriləcək. İlk KOB Fest yarmarkası 25 aprel tarixində Bakıda keçirilib.
Yarmarkada iştirak etmək istəyən sahibkarlar KOBİA-ya elektron qaydada müraciət edə bilərlər.
