Rusiyada makaron məmulatlarının qiymətlərinin artması gözlənilir. Bu səbəbdən rus makaron məmulatlarının istehsalçıları 22 sentyabr tarixində yığıncaq keçiriblər. Bu haqda İnterfax məlumat yayıb.
İstehsalçıların sözlərinə görə, qiymət artımına əsas səbəb makaron məmulatlarının istehsalında istifadə olunan xüsusi növ buğdanın qiymətinin artmasıdır. Buğdanın qiymətinin qalxmasına səbəb isə məhsulların ixrac olunması və əkin sahələrinin az olmasıdır.
“Hal-hazırda Rusiyada ildə 300-400 min ton xüsusi növ buğda istehsal olunur. Sovet vaxtı isə bu rəqəm 1,5 milyon tona çatırdı”, - deyə istehsalçılardan biri Valeriy Pokornyak bildirib.
“Artıq 15% qiymət artımı barədə bildirmişik, lakin buğdanın, qablaşdırmanın və logistikanın qiymətlərində artım davam edir. Bu da növbəti qiymət artımına gətirib çıxaracaq”, - Baysad şirkətinin nümayəndəsi Larisa Levina bildirib.
Qeyd edək ki, Azərbacan 2020-ci ildə 14 milyon manatdan çox məbləğdə makaron məmulatları idxal edib. Bunun da 5 milyon manata yaxını, yəni 30%-dən çox hissəsi Rusiyadan idxal olunub. Bu səbəbdən ehtimal olunur ki, qiymət artımı Azərbaycanın daxili bazarına da öz təsirini göstərəcək.
