Rusiya ilə Ukrayna arasında olan münaqişə təkcə neft-qaz məhsullarının qiymətinə deyil, eləcə də qızıl bazarına öz təsirini göstərir. Bəs bu vəziyyət Azərbaycanda zərgərlik məmulatlarının qiymətinə necə təsir edir? Məsələ ilə bağlı Azərbaycan Zərgərlər Assosiasiyasının sədri Toğrul Abbasquliyev 9 mart tarixində Reporta məlumat verib.
Onun sözlərinə görə, xam qızılın qiyməti son iki həftədə hissedilən dərəcədə yüksəlib: “Dünən xam qızılın bir qramının qiyməti 66 dollara qədər qalxmışdı. İki həftə öncə isə bu qiymət 60-61 dollar civarında idi”.
Toğrul Abbasquliyev vurğulayıb ki, zərgərlik məmulatlarının qiymətləri xammaldan asılı olduğundan qızıl məhsullarının qiyməti də qalxır.
“Başqa bir təsir isə Rusiyadan Azərbaycana kifayət qədər zərgərlik məmulatlarının idxal olması ilə bağlıdır. Bu əməliyyatlar zamanı rubldan istifadə olunduğu üçün təsir o qədər də hiss olunmur. Amma böhranın müddətindən asılı olaraq təsirin səviyyəsi də dəyişə bilər”, - deyə sədr bildirib.
Zərgər Camal Qasımlı da qızılın qiymətinin artdığını söyləyir.
“3-4 gün öncə qiymətlər artmağa başlayıb. Əvvəl qızılın bir qramını 85 manata satırdıqsa, indi onun dəyəri 90 manata kimi qalxıb. Hələlik zərgərlik məmulatlarının qiymətləri eyni qalıb. Amma qızılın qiyməti çox qalxarsa, biz də o qiymətlə satmağa məcbur olacağıq”, - zərgər deyib.
