Bu gün Azərbaycandan ixrac olunan narın təqribən 80%-ə qədəri Rusiya bazarına, 20%-i isə Ukrayna bazarına göndərilir. Bəs bu iki ölkə arasında olan münaqişə yerli sahibkarların bu bazarlara olan nar tədarükünə necə təsir göstərəcək? Məsələ barəsində martın 11-də Azərbaycan Nar İstehsalçıları və İxracatçıları Assosiasiyasının sədri Fərhad Qaraşov Reporta danışıb.
Onun sözlərinə görə, nar ixracı sentyabr ayının sonundan başlayaraq dekabr ayı da daxil olmaqla davam edir. Bu səbəbdən bu gün müharibənin məhsulun ixracına təsiri yoxdur.
“Amma proseslər bu cür gedərsə, Rusiyaya iqtisadi sanksiyaların tətbiqi davam edərsə, Rusiya bazarında alıcılıq qabiliyyəti azalacaq və bu da bizim ixrac potensialımızı aşağı salacaq”, - deyə sədr bildirib.
Sədr qeyd edib ki, Rusiya rublunun dəyər itirməsi də bazarlarda narın qiymət artımına səbəb olacaq: “Biz onsuz da xərclərə görə narı baha qiymətə yetişdiririk. Rusiya bazarında da qiymətləri yüksək qoymağa məcburuq. Ukrayna bazarına gəlincə, vəziyyət belə davam edərsə, biz bu bazarı itirmiş oluruq”.
