Bakı Ağır Cinayətlər Məhkəməsində XİN-in İşlər idarəsinin sabiq müdiri Fərhad Mollazadənin və Təsərrüfat şöbəsinin keçmiş müdiri Səlim Əlizadənin 7 il müddətinə azadlıqdan məhrum edilməsi tələb olunub. Bu barədə dekabrın 15-də Qafqazinfo məlumat paylaşıb.
İttihama əsasən, F. Mollazadə və S. Əlizadə digər şəxslər ilə əlbir olaraq çoxsaylı şirkətlər vasitəsilə nazirlik üçün ayrılan 2 milyon 543 min 173 manat vəsaitini mənimsəyiblər.
Fərhad Mollazadə dəymiş ziyanın 2,3 milyon manatını ödəyib.
Verilən məlumata görə, hər iki şəxs 2020-ci ilin iyulunda Dövlət Təhlükəsizliyi Xidmətinin Xarici İşlər Nazirliyində apardığı əməliyyat zamanı saxlanılıb. Lakin dekabrda Səbail Rayon Məhkəməsinin qərarına əsasən, onlar ev dustaqlığına buraxılıb.
Səlim Əlizadə Azərbaycanı “Avroviziya-2010”da təmsil etmiş müğənni Səfurə Əlizadənin atasıdır. O, həmçinin keçmiş Sənaye və Energetika naziri Natiq Əliyevin qudasıdır.
