“Şəhərdən Kəndə” layihəsi çərçivəsində Şəki rayonunun Öryət kəndində yerləşən fermer Etibar Nuriyevin “BioGarden” təsərrüfatına dəstək göstərilib. Bu barədə Kənd Təsərrüfatı Nazirliyi 11 avqust tarixində məlumat verib.
“Şəhərdən Kəndə” layihəsinin dəstəyi ilə təsərrüfatda yenidənqurma işləri aparılıb və təsərrüfatın giriş hissəsi abadlaşdırılıb. Təndir və kürələr quraşdırılıb, bildirçin və qırqovullar üçün saxlama yeri yaradılıb. Həmçinin təsərrüfat bir sıra avadanlıqlar və əşyalarla (vitrin soyuducusu, çay dəstləri, işçi heyəti üçün geyim dəstləri) təmin olunub.
“BioGarden” təsərrüfatı fəaliyyətinə 13 il əvvəl başlayıb. Etibar Nuriyevin sözlərinə görə, o bu bağı yaratmadan öncə dünyanın bir çox ölkələrini gəzib və biliklər toplayıb. Fermerin bağında yerli və xarici ölkələrdən gətirilmiş müxtəlif çeşiddə ekoloji təmiz meyvə və giləmeyvələr yetişdirilir. “BioGarden”ə giriş yerli vətəndaşlar üçün 5, xarici turistlər üçün isə 8 manatdır. Hər il təsərrüfatı 6 minə yaxın turist ziyarət edir.
“Paşa Holdinq”in dəstəyi ilə həyata keçirilən “Şəhərdən Kəndə” layihəsinin məqsədi aqroturizmin inkişaf etdirilməsi, regionlarda yaşayan sakinlərin məşğulluğunun artırılması və yerli fermer təsərrüfatları üçün alternativ satış kanalı yaratmaqdır.
Layihədə iştirak etmək üçün bu günə qədər 200-ə yaxın aqrar sahibkar qeydiyyatdan keçib. “Şəhərdən Kəndə” layihəsinə qoşulmaq və öz təsərrüfatında turistləri qəbul edərək əlavə gəlir imkanı əldə etmək istəyən şəxslər www.tovillage.az saytından qeydiyyatdan keçə bilərlər.
