Sumqayıtda məktəblinin koronavirusdan vəfat etməsi ilə bağlı Səhiyyə və Təhsil Nazirlikləri oktyabrın 13-də birgə məlumat yayıblar.
Məlumata əsasən, Sumqayıt sakini Əsgərov Kamil İslam oğlu oktyabrın 9-da hərarət, boğulma, təngnəfəslik əlamətləri ilə Sumqayıt şəhər Uşaq Xəstəxanasının reanimasiyasına çatdırılmışdır.
Xəstəyə ilkin olaraq “kəskin bronxit, bronxospazm” diaqnozu qoyulmuşdur. Daha sonra onun COVID-19-a yoluxduğu müəyyən edilmişdir. Həkimlərin təyin etdiyi son klinik diaqnoz isə COVID-19, ikitərəfli pnevmoniya, kəskin tənəffüs çatışmazlığı, alimentar piylənmə olub.
Oktyabrın 10-dan başlayan müalicəyə baxmayaraq Kamil Əsgərov oktyabrın 11-də kəskin ürək-tənəffüs çatışmazlığından vəfat edib.
Qurumlardan bildirilir ki, COVID-19-a yoluxanlarda alimentar piylənmənin olması və qanda şəkər miqdarının yüksək olması xəstəliyin gedişatına ağırlaşdırıcı təsir göstərir. Həmçinin xəstənin beş gün ərzində xəstəxanaya müraciət etməməsi gedişata mənfi təsir edib.
Səhiyyə və Təhsil Nazirlikləri valideynlərə 12 yaşdan yuxarı yeniyetmələrin vaksinasiya olunmalarını tövsiyə ediblər. Yeniyetmələrin vaksinasiyası Bakı Sağlamlıq Mərkəzində aparılır. Bunun üçün hər iki valideynin razılığı və yaxud müvafiq tibbi göstərişlər olmalıdır.
