Bakı Nəqliyyat Agentliyi oktyabrın 21-də aparılan statistik araşdırmalar zamanı vətəndaşlar tərəfindən ən çox şikayət olunan marşrut xətləri haqqında məlumat yayıb.
Təhlillərə əsasən, bu şirkətlər “Çinar-Trans” MMC, “Şidili” MMC, daşıyıcı şirkət “Faiqoğlu”, “BMH” MMC, “Grand-Bus” MMC və “Ayşən-LTD” MMC-dir.
Ümumilikdə, qeyd olunan marşrutlarla bağlı Agentliyə 800-ə yaxın müraciət daxil olub.
Şikayətlərə əsasən monitorinqlər aparılıb. Köhnəlmiş oturacaqlar, texniki cəhətdən nasaz və natəmiz olan avtobusların istismarda olduğu müşahidə olunub.
Həmçinin sürücülər tərəfindən normadan artıq sərnişin götürülərək açıq qapılarla hərəkət etməsi, sükan arxasında siqaret çəkməsi, sürücülərin sərnişinlərlə kobud davranması halları aşkar edilib.
Sözügedən marşrutların istismarcılarına 1 ay müddətində fəaliyyətlərinin təkmilləşdirilməsi və xidmət keyfiyyətinin artırılması ilə bağlı son xəbərdarlıq edilib.
