Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin yeni Sosial Xidmət Mərkəzi fəaliyyətə başlayıb. Bu haqda dekabrın 30-da qurumdan məlumat verilib.
Mərkəz Sosial Xidmətlər Agentliyinin 8 saylı filialının yerləşdiyi Abşeron rayonu üzrə fəaliyyət göstərəcək. İlk mərhələdə sağlamlıq imkanları məhdud uşaqlar ilkin sosial reabilitasiya xidməti ilə təmin ediləcək. Uşaqlarla yanaşı, valideynlər üçün də sosial-psixoloji yardım xidməti təşkil ediləcək. Onlar həm fərdi, həm də qrup terapiyalarına cəlb olunacaqlar və bacarıqlarının artırılması istiqamətində təlimlər keçəcəklər.
Hazırda mərkəzdə 38 sağlamlıq imkanları məhdud uşaq fərdi və qrup məşğələləri keçir. Mərkəzdə sosial işçi, psixoloq, loqoped, sosial pedaqoq və aktiv terapiya üzrə mütəxəssis xidmət göstərir.
Xidmətdən faydalanmaq istəyənlər Sosial Xidmətlər Agentliyinə və Agentliyin Abşeron rayonu üzrə filialına (Abşeron rayonu, Xırdalan ş. Heydər Əliyev prospekti 249) müraciət edə bilərlər.
[URIS id=20607]
